மர்ம மனிதன்

கபாலிகளுக்கு நடுவில்
வேதாளங்களுக்கு நடுவில்
தெறிகளுக்கு நடுவில் 
விஸ்வரூபங்களுக்கு நடுவில்
சுவாதியை ஒருவன்
இழுத்து கழுத்தை அறுத்து
கொன்றுவிட்டு போனானாம்
இப்போது அவன் பெயர் மர்ம மனிதன்
நுங்கம் பாக்கத்தில்
ரயில் நிலையத்தில்
சவுக்கு மரத்தின் ஒரு சிறு சுள்ளியை கூட
முறித்து துரத்த முடியாத நாயகர்கள்
ஒரு ரயிலை தூக்கி அவன் மீது இருந்திருக்க வேண்டும்
தண்டவாளங்களை பிடுங்கி எடுத்து
அவன் மண்டையில் நொறுக்கி இருக்கவேண்டும்
ஆளுக்கு ஒரு இருக்கையை
பெயர்த்து எடுத்து
அவனை கிழித்திருக்க வேண்டும்
மர்ம மனிதன் என்று சொல்லிக்கொண்டு
விசில் அடியுங்கள்
நுங்கம் பாக்கம் ரயில் நிலைய ஆம்பிளைகளே
திரையில் ஒரே உதையில்
பத்தாயிரம் பேரை வீழ்த்தும் நாயகன் தோன்றுவான் !